रीतसर कायदेशीर पद्धतीने लोकशाही आघाडीचे गटनेते सौरभ पाटील यांना मिळाले स्थायी समिती सदस्यपद


कराड नगरपालिकेचे राजकारण तसे नेहमीच चर्चेत असते ते विविध कारणांनी. कारण कोणतेही असो, चर्चा तर होणारच.याप्रमाणे कराड नगरपालिकेच्या राजकारणाची अनेकांना आवड आहे. डाव-प्रतिडाव, आरोप-प्रत्यारोप हे तर ठरलेलेच असते. विषय समित्यांच्या निवडणुकांमध्ये अभूतपूर्व खेळी करून लोकशाही आघाडीने स्थायी समितीचे सदस्यपद मिळविल्यामुळे राजकीय खेळीत लोकशाही आघाडी आघाडीवर असल्याचे यावेळी दिसून आले. जनशक्ती आघाडी १६, लोकशाही आघाडी ६ भाजप ५ अशी सदस्य संख्या रीतसर निवडणूक झाल्यानंतर गट किंवा आघाडी म्हणून अधिकृतपणे तीस दिवसांमध्ये नोंद असलेली सदस्य संख्या आहे.या संख्याबळाचा विचार करून अथवा अधिकृतपणे नोंद असणाऱ्या संख्येनुसार पीठासन अधिकारी निर्णय घेतात. 


कराड नगरपालिकेच्या झालेल्या विषय समितीच्या सभापती निवडीमध्ये जनशक्ती आघाडीच्या नगरसेवकांना सभापती म्हणून काम करण्याची संधी अधिक मिळणे हे स्वाभाविक आहे. यानुसार विविध समित्यांच्या सभापतींची निवड झाली आहे.दरम्यान गेल्या तीन वर्षांमध्ये स्थायी समितीचे सदस्य म्हणून ज्येष्ठ नगरसेवक विनायक पावसकर कार्यरत होते. यावेळी अपक्ष नगरसेवक इंद्रजित गुजर यांना भाजपच्यावतीने स्थायी समितीचे सदस्य म्हणून संधी देण्याचा निर्णय घेण्यात आला आणि दगाफटका झाला की काय ? याबाबत सध्या चर्चा सुरू आहे. कारण स्थायी समितीच्या सदस्यपदी लोकशाही आघाडीचे गटनेते सौरभ पाटील यांची निवड करण्यात आली आहे. लोकशाही आघाडीची सदस्य संख्या सहा व भाजपची सदस्य संख्या पाच असल्यामुळे सौरभ पाटील यांना स्थायी समितीचे सदस्यपद मिळालेले आहे. 


नगरपालिकेच्या राजकारणात स्थायी समिती ही अत्यंत महत्त्वाची व प्रभावी कार्य करणारी समिती आहे. या समितीचे सदस्य असणे अत्यंत महत्त्वाचे आहे. यामुळे समितीमध्ये सदस्यत्व आपल्याला मिळावे, यासाठी अनेक वेळेला वेगवेगळे प्रयत्न केला जातो.विशेषता स्थायी समितीमध्ये प्रत्येक विषयाचा सांगोपांग विचार होऊन स्थायी समितीमध्ये विषयाला मंजूर दिल्यानंतर तो विषय सर्वसाधारण सभेमध्ये घेतला जातो. स्थायी समिती सदस्य प्रत्येक विषयावर बारीक-सारीक चर्चा करून निर्णय घेतात आणि याची पुढील कार्यवाही, मंजुरीसाठी तो विषय सर्वसाधारण सभेपुढे जातो.गेल्या तीन वर्षापासून सौरभ पाटील हे लोकशाही आघाडीचे विरोधी गटनेते म्हणून कराड नगरपालिकेच्या राजकारणात कार्यरत आहेत. 


सौरभ पाटील पहिल्यांदाच नगरसेवक झाल्यानंतर त्यांना विरोधामध्ये काम करण्याचा प्रसंग उद्भवला. वास्तविक विरोधात बसून बरेच काही शिकता येईल, हा विचार करून सौरभ पाटील यांनी नगरपालिकेच्या राजकारणाचा श्रीगणेशा केला. आणि सकारात्मक कामांना पाठिंबा देणे हे धोरण अवलंबिले. विरोधासाठी विरोध करायचा नाही, हा पायाच मुळात कराड नगरपालिका राजकारणाचा आहे.आदरणीय स्वर्गीय पी. डी. पाटीलसाहेब यांनी कराड नगरपालिका राजकारणामध्ये अनेक आदर्श घालून दिले आहेत. आदर्श पाय वाटेने वाटचाल केल्यानंतर कराड नगरपालिकेच्या माध्यमातून अनेक चांगले उपक्रम राबवता येतात, चांगले काम करता येते, हे पी. डी. पाटीलसाहेब यांनी करून दाखविला आहे. याच आपल्या आजोबांच्या पायवाटेने कराड नगरपालिकेच्या राजकारणात वाटचाल करायची, या हेतूने सौरभ पाटील हे कराड नगरपालिका राजकारणात उतरले. 


तीन वर्षांमध्ये विरोधात असताना त्रयस्थपणे नगरपालिकेचा कारभार चालतो कसा ? प्रत्येक विषयाची गांभीर्य पाहून त्याचा अभ्यास करून सभागृहांमध्ये आपले मत मांडण्याचा प्रयत्न सौरभ पाटील यांनी केला आहे. स्थायी समितीचे सदस्यपद सौरभ पाटील यांना मिळाल्यानंतर आता ते कराडच्या विकास कामांमध्ये अधिकृतपणे सहभाग घेऊ शकतात.याचा अर्थ गेल्या तीन वर्षांमध्ये केवळ सभागृहांमध्ये त्यांना मत मांडण्याचा अधिकार होता. स्थायी समितीचे सदस्यपद मिळाल्यामुळे आता स्थायी समिती बरोबरच नगरपालिकेच्या सभागृहात एखाद्या विषयाचे सविस्तर विश्लेषण अथवा एखादा विषय कराड शहराच्या प्रगतीसाठी कसा आवश्यक आहे, हे सर्व सदस्यांना म्हणजे सभागृहाला पटवून देऊ शकतात.


कराड नगरपालिका राजकारणामध्ये लोकशाही आघाडीला अनन्यसाधारण महत्त्व आहे. कारण कराड नगरपालिकेच्या राजकारणामध्ये नेहमीच लोकशाही आघाडी आघाडीवर राहिलेली आहे.सौरभ पाटील यांना स्थायी समितीचे सदस्यपद मिळाल्यामुळे पुढील दोन वर्षामध्ये सौरभ पाटील नाविन्यपूर्ण काम करू शकतात अथवा विकास कामांसाठी महत्त्वाच्या सूचना करू शकतात.भाजपाला स्थायी समितीचे सदस्यपद कायदेशीररित्या देता येणार नाही, अशी भूमिका पीठासन अधिकारी यांनी घेतल्यानंतर भाजपच्या स्थानिक सदस्यांनी जो थयथयाट केला, तो अशोभनीय आहे. गत कालावधीमध्ये लोकशाही आघाडीलाच खऱ्या अर्थाने स्थायी समितीचे सदस्यपद मिळणे आवश्यक होते. मात्र तत्कालीन परिस्थितीत त्यांना ते मिळाले नाही. म्हणून त्यांनी फारसा कलकलाट केला नाही‌. योग्य वेळेची संधी पाहून आता लोकशाही आघाडीला स्थायी समिती सदस्यपद मिळाले आहे. यानंतर भाजपच्या स्थानिक सदस्यांनी उगाच बाऊ करणे योग्य नाही.


Popular posts
सातारा जिल्ह्यात 21 रुग्णांची नोंद.... एकूण रुग्णांची संख्या 113
अशासकीय पदावरील नियुक्त्या रद्द ......महाराष्ट्र राज्य सहकारी परिषद, राज्यस्तरीय लेखा समिती, राज्य कृषि मूल्य आयोग
Image
कराड वार्तापत्र - गोरख तावरे जनशक्ती आघाडीमध्ये बंड झाल्याने गटात गट निर्माण जानेवारी महिन्यातल्या पहिल्या आठवड्यात होणाऱ्या विविध समितींच्या सभापती निवडीच्या अनुषंगाने कराड नगरपालिका राजकारणात हालचालीस प्रारंभ झाला आहे. दरम्यान जनशक्ती आघाडीमध्ये उभी फूट पडली आहे. उपनगराध्यक्ष जयवंत पाटील यांनी आपल्या गटाला स्वतंत्र बसण्यासाठी वेगळी जागा सभागृहात द्यावी, अशी मागणी केल्याने जनशक्ती आघाडीत फूट पडली. कराड नगरपालिकेच्या राजकारणातील गटात गट निर्माण झाल्याची चर्चा संपूर्ण शहरभर सुरू आहे. दरम्यान ऐतिहासिक कराड नगरपालिका राजकारणातील आघाड्यांना फुटीचे ग्रहण लागले आहे. यापूर्वीही अनेक वेळेला नगरपालिकेमध्ये वेगवेगळ्या विचाराच्या निवडून आलेल्या आघाड्यांमध्ये बंड झाले, फूट पडली अशीच परिस्थिती सध्या निर्माण झाली आहे. स्वर्गीय पी. डी. पाटीलसाहेब कराड नगरपालिकेचे नगराध्यक्ष असताना 25 विरुद्ध 24 अशी सदस्य संख्या होती. दरम्यान एका सदस्याने बंड पुकारून विरोधात गेल्यामुळे सत्ताधारी गट अल्पमतात आला होता. दरम्यान मुरब्बी राजकारणी असणारे पी. डी. पाटील यांनी एका दिवसात हे बंड मोडून काढले. आपला गेलेला सदस्य पुन्हा आपल्या गटात घेऊन आले. नुकत्याच झालेल्या विधानसभा निवडणुकीच्या राजकारणामुळे कराड नगरपालिकेतील सत्ताधारी जनशक्ती आघाडीमध्ये फुट पडली असे बोलले जात आहे. नगरपालिका म्हटले की, गट-तट, आघाड्या, कुरबुडी, देणे घेणे असे सर्रास घडत असते. जनशक्ती आघाडी फुटली, नगरसेवक घेत असलेल्या वेगवेगळ्या भूमिकेमुळे फुटीचे राजकारण हा मुद्दा ऐरणीवर आला.कराड शहरासाठी विकास निधी राज्य शासनाकडून येतो. हा विकास निधी विविध कामावर खर्च करीत असताना कामाचा दर्जा बिलकुल नाही, ठेकेदार दर्जाहीन कामे करतात, हे अनेक कामे पाहिल्यानंतर स्पष्ट होत आहे. दर्जाहीन विकास कामे होत असल्याने नागरिकांची सातत्याने ओरड सुरू आहे. मात्र याकडे नगरसेवक अथवा प्रशासन गांभीर्याने पाहत नाही.यामुळे विद्यमान सत्ताधारी गटातील नगरसेवकांबद्दल नागरिकांच्या मनामध्ये तीव्र संताप निर्माण झाला आहे. मुख्य पदाधिकाऱ्यांसह सर्वच नगरसेवक कराड शहराच्या विकासाकडे लक्ष देणार का ? असा प्रश्न विचारला जात आहे. उपनगराध्यक्ष जयवंत पाटील यांनी गटात गट केलेला कायम राहणार का ? सभापतीच्या निवडीवेळी "तलवार म्यान" होणार का ? हे येणाऱ्या काही दिवसात स्पष्ट होईल. कारण जयवंत पाटील उपनगराध्यक्ष झाल्यापासून सत्ताधारी गटाचा सर्व कारभार जयवंत पाटील यांच्या नेतृत्वाखाली चालला आहे. दरम्यान जयवंत पाटील यांनीच बंड पुकारल्यामुळे जनशक्ती आघाडीचे काय होणार ? असा सवाल उपस्थित होत आहे. जनशक्ती आघाडीतील वाद चव्हाट्यावर आला आणि उपनगराध्यक्ष जयंवत पाटील यांनी सभागृहात वेगळी बसण्याची मागणी केली. कराड नगरपालिका राजकारणाची दिशाच बदलली आहे. उपनगराध्यक्ष जयवंत पाटील व माजी उपनगराध्यक्ष राजेंद्र यादव यांच्यामध्ये समेट घडावा यासाठी प्रयत्न केला जात आहे. विविध समितीच्या सभापतीची निवड करण्याचा अधिकार कोणाला ? आघाडीच्या अध्यक्षांना का नगरपालिकेतील गटनेत्याला ? याबाबत उलट सुलट चर्चा सुरू झाली आहे.दरम्यान विविध समितीच्या सभापती निवडीच्या अनुषंगाने आत्तापर्यंत राजेंद्र माने,महेश कांबळे, किरण पाटील यांना सभापती पदाची संधी मिळालेली नाही. यावेळेला सभापतीपदाची लॉटरी या तीन उमेद नगरसेवकांना लागेल का नाही ? हे अद्याप स्पष्ट झालेले नाही. नुकत्याच झालेल्या विधानसभा निवडणुकीमध्ये कराडच्या नगरसेवकांची भूमिका संभ्रमावस्थेत राहिली होती. कोणत्या उमेदवाराला पाठिंबा कुणाला द्यायचा ? प्रचार कोणाचा करायचा ? याबाबत मात्र कराड नगरपालिकेतील नगरसेवकांचे लवकर एकमत झाले नाही. कराडच्या नगरसेवकांनी आपली भूमिका लवकर स्पष्ट केली नाही. विधानसभा निवडणुकीतील नगरसेवकांच्या भूमिकेबाबत कराडमध्ये आजही चर्चा सुरू आहे.कराड नगरपालिकेला निवडून येणार्‍या नगरसेवकांची भूमिका कराड शहराच्या विकासाबाबत संवेदनशील हवी, मात्र सध्या ती दिसून येत नाही.  नगरपालिका निवडणुकीनंतर कराड नगरपालिकेमध्ये राजकीय तीन गट अस्तित्वात आले. यामध्ये लोकशाही आघाडी विरोधात बसली आहे. भाजपाचे काही नगरसेवक निवडून आले त्यांचा एक गट आहे. त्याचबरोबर सत्ताधारी म्हणून जनशक्ती आघाडी कारभार पाहत आहे. तर भाजपच्या नगराध्यक्षा स्वतंत्रपणे आपला कारभार करीत आहेत. उपनगराध्यक्ष जयवंत पाटील यांनी आपल्या पाच नगरसेवकांचा वेगळा गट निर्माण केला आहे. उपनगराध्यक्ष जयवंत पाटील यांचा गट म्हणजे गटात गट निर्माण झालेला आहे. जनशक्ती आघाडीच्या निवडून आलेल्या नगरसेवकांच्या बरोबर आता इथून पुढे आपला "घरोबा" असणार नाही असे सांगून त्यांनी कराड नगरपालिकेचा कारभार सुरू केला आहे. यशवंत विकास आघाडीचे राजेंद्रसिंह यादव यांना मांणणारे नगरसेवक आहेत. मात्र राजेंद्रसिंह यादव हे नगरपालिका राजकारणात, नगरपालिका कारभार चालवण्यासाठी जेवढा वेळ द्यायला हवा, तेवढा वेळ देत नाही, त्यामुळे नगरसेवकांनी अडचणी कोणासमोर मांडायच्या ? हा प्रश्नच आहे. अशी एकाकी पडलेले नगरसेवक आता एकत्रित सर्वांची मोट बांधण्याचा प्रयत्न करीत आहेत. याला किती प्रतिसाद मिळेल, हे आत्ताच सांगता येणार नाही. येणाऱ्या कालावधीमध्ये गटातला गट शिल्लक राहतो का ? जनशक्ती आघाडीच्या छत्रछायेखाली निवडून आलेले सर्व नगरसेवक एकत्र राहणार का ? हे काही कालावधीनंतर स्पष्ट होईल.  जानेवारी महिन्याच्या पहिल्या आठवड्यामध्ये विविध समितींच्या सभापतींची निवडणूक होणार आहे. यावेळी गटातला गट अथवा जनशक्ती आघाडीची काय रणनीती राहणार हे पहावे लागेल. कराडमधील राजकीय समीकरणांबाबत उत्सुकता निर्माण झाली आहे. दरम्यान, उपनगराध्यक्ष जयवंत पाटील यांनी आपल्यासोबत महेश कांबळे, कश्मिरा इंगवले, माया भोसले, अरुणा पाटील हे नगरेसवक असल्याचा दावा केला आहे. उपनगराध्यक्ष जयवंत पाटील हे भाजपचे डॉ. अतुल भोसले यांचे समर्थक आहेत. तर राजेंद्रसिंह यादव गट श्री. छ. उदयनराजे भोसले यांचे समर्थक आहेत. त्यामुळेच आता नगरपालिका राजकारणात काय होणार ? याबाबत उत्सुकता निर्माण झाली आहे. नगरपालिका निवडणुकीत आ. पृथ्वीराज चव्हाण यांच्या नेतृत्वाखालील यशवंत जनशक्ती लोकसेवा आघाडीचे 16 नगरसेवक विजयी झाले. तर या आघाडीला एका महिला नगरसेविकेने पाठिंबा दिला. दरम्यान निवडून आल्यानंतर प्रथम जनशक्ती आघाडीच्या नगरसेवकांनी पृथ्वीराज चव्हाण यांचा विश्वासघात केला आणि त्यांचे नेतृत्व झुगारून दिले. कराड नगरपालिकेत भाजपाचे पाच, लोकशाही आघाडीचे सहा तर बहुमतात असलेल्या जनशक्ती आघाडीसह आ. पृथ्वीराज चव्हाण यांचे नेतृत्व मानणारे कॉग्रेसचे शहराध्यक्ष राजेंद्र माने असे गट कार्यरत आहेत. उपनगराध्यक्ष जयवंत पाटील यांनी राजीनामा द्यावा, असे बहुमतात असलेल्या जनशक्ती आघाडीतील काही नगरसेवकांचे म्हणणे होते. दरम्यान उपनगराध्यक्ष पाच वर्ष माझ्याकडे राहील" या अटीवर "उपनगराध्यक्षपद घेतले असल्याचे जयंतराव पाटील सांगतात. यामुळे उपनगराध्यक्ष बदलाचा प्रश्नच येत नाही. यशवंत आघाडी राजेंद्रसिंह यादव यांची, जनशक्ती आघाडी अरुण जाधव यांची तर लोकसेवा आघाडी जयवंतराव पाटील यांची आघाडी आहे. या तिघे पृथ्वीराज चव्हाण यांच्या नेतृत्वाखाली एकत्र आले होते. जयवंत पाटील यांच्याकडे उपनगराध्यक्षपद असल्यामुळे नगरपालिकेत दररोज जयवंत पाटील दिसतात. अरुण जाधव नगरपालिकेकडे फिरकतही नाहीत. तर राजेंद्रसिंह यादव आपल्या कामाचा व्याप सांभाळून, जेवढा वेळ देता येईल तेवढाच वेळ देतात. यामुळे अनेक प्रश्न निर्माण झाले आहेत, ते कोण सोडवणार ? हा खरा प्रश्न निर्माण झाला आहे.
Image
वर्धन अग्रोने ऊस बिल त्वरित द्यावीत अन्यथा आंदोलन... सचिन नलवडे यांचा इशारा
Image
चहा नव्हे अमृततुल्य, कराडच्या युवकांचा अभिनव उपक्रम......शिवनेरी अमृततुल्य
Image