स्वकर्तुत्वाने राजकारणाच्या पटलावर यशस्वी झालेले कराडकरांचे अशोकराव पाटील उर्फ दादा


स्वकर्तुत्वाने राजकारणाच्या पटलावर यशस्वी झालेले कराडकरांचे अशोकराव पाटील उर्फ दादा


काँग्रेस पक्षाचा निष्ठावंत कार्यकर्ता, कराड शहराच्या विकासाचे स्वप्न पाहणारा नगरसेवक, दिन-दलितांचे अश्रू पुसण्यासाठी नेहमी एक पाऊल पुढे असणारे अशोकराव पाटील ( दादा) यांचा आज वाढदिवस. त्यांच्या व्यक्तिमत्त्वाचा व कार्याचा घेतलेला आढावा....... - गोरख तावरे


स्वकर्तुत्वावर समाजामध्ये आपले वेगळे स्थान निर्माण करणे हे वाटते तितके सोपे काम नाही. यासाठी बराच संघर्ष करावा लागतो आणि हा संघर्ष करण्याची मानसिकता असणारे जीवनात यशस्वी होतात, असेच व्यक्तिमत्त्व अशोकराव पाटील उर्फ दादा यांचे आहे. वडिलार्जित शेती व्यवसाय करण्यापेक्षा समाजामध्ये वेगळे काही करण्याची जिद्द असणारे अशोकराव पाटील यांनी महाविद्यालयीन जीवनापासूनच राजकारणाला सुरुवात केली. महाविद्यालयामध्ये शिक्षण घेत असतानाच टॅक्सीचा व्यवसाय केला.आपल्या बरोबर असणाऱ्या तरुण कार्यकर्त्यांबरोबरच राजकारणाचा श्रीगणेशा केला. कराड नगरपालिकेच्या राजकारणात तत्कालीन परिस्थितीत संघर्ष करण्याची मानसिकता ठेवूनच अशोकराव पाटील राजकारणाच्या मैदानात उतरले. विशेष म्हणजे राजकारणात अशोकराव पाटील यशस्वी झाले. दरम्यान मध्यंतरीच्या काळामध्ये बिकट वाटेने ही त्यांना वाटचाल करावी लागली. मात्र मनोधैर्य सक्षम करून त्यांनी ही वाट पार केली.


अशोकराव पाटील यांच्याबरोबर तत्कालीन परिस्थितीमध्ये माधवराव पवार, हणमंतराव निर्मळ, प्रतापराव भोपते, सूर्यवंशी यांच्यासह अनेक सहकाऱ्यांचा नगरपालिकेत राजकीय गट होता.सार्वजनिक जीवनात पाऊल ठेवताना आणि काँग्रेस पक्षावर प्रचंड निष्ठा असणाऱ्या अशोकराव पाटील यांनी युवक काँग्रेसपासून त्यांनी पक्षात काम केले आहे. युवक काँग्रेसचे जिल्हा उपाध्यक्ष, प्रदेश काँग्रेसचे उपाध्यक्ष म्हणून त्यांनी उल्लेखनीय काम केले आहे. प्रियदर्शनी नागरी सहकारी पतसंस्था निर्माण केली."प्रियदर्शनी"च्या माध्यमातून समाजातील गोरगरीब होतकरू तरुणांना उद्योगासाठी कर्जपुरवठा केला. स्वर्गीय इंदिरा गांधी यांना "प्रियदर्शनी" असे संबोधले जायचे हेच नाव घेऊन अशोकराव पाटील यांनी पतसंस्थेची संलग्न असणाऱ्या अनेक संस्था "प्रियदर्शनी" या नावानेच उभ्या केल्या. काँग्रेसचे तत्कालीन मंत्री रणजित देशमुख यांचेसोबत अशोकराव पाटील यांचा मित्रत्वाचा ऋणानुबंध सर्वपरिचित आहे. प्रियदर्शनी उद्योग समूहाचे संस्थापक म्हणून आजही अशोकराव पाटील कराड शहराला परिचित आहेत.


स्वर्गीय प्रेमलाकाकी चव्हाण, स्वर्गीय आदरणीय पी.डी. पाटीलसाहेब, अर्बन कुटुंब प्रमुख स्व. द.शि. एरम, सुभाषराव जोशी, यांच्याबरोबर अशोकराव पाटील यांनी समाजकारण, राजकारणात, बँकिंग क्षेत्रामध्ये काम केले आहे.दीर्घकाळ नगरपालिका राजकारणात सत्तेत राहण्याचा प्रदीर्घ अनुभव असणारे अशोकराव पाटील सत्तेत नसताना ही शांतपणे नगरपालिकेचा कारभार कसा चालतो, हे त्रयस्थपणे सर्व पाहत असतात. समाजकारणाबरोबर राजकारण करण्याची गोडी निर्माण झाल्यानंतर अशोकराव पाटील यांनी सहकार, क्रीडा, सामाजिक, बँकिंग अशा विविध क्षेत्रात उल्लेखनीय व कौतुकास्पद काम केले आहे. कराड शहर व तालुक्यातील कष्टकरी आणि छोटे-मोठे व्यवसाय करणाऱ्यांच्या पाठीशी ठामपणे अशोकराव पाटील पाटील नेहमीच खंबीरपणे उभे राहत असतात. श्रमिक, दलित, कष्टकरी घटकाला अडचण निर्माण झाली तर ते अशोकराव पाटील यांच्याकडे आशेने पाहत असतात अथवा त्यांच्याकडे आपली समस्या घेऊन जातात आणि ते सोडवण्यासाठी विनंती करतात.मग मात्र अशोकराव पाटील यांच्यामधील चळवळी कार्यकर्ता जागा होतो आणि प्रश्न सोडवण्यासाठी ते कसोशीने प्रयत्न करतात. म्हणूनच अशोकराव पाटील उर्फ दादा म्हणून ते सर्वश्रुत आहेत. अशोकराव पाटील यांना "दादा" म्हणून समाज आदरपूर्वक गौरवाने सन्मान करीत आहे.


कराड नगरपालिकेच्या पहिल्या महिला नगराध्यक्ष म्हणून सौ. अर्चना अशोकराव पाटील यांना मान व सन्मान मिळालेला आहे. सौ. अर्चना पाटील या अशोकदादा यांच्या अर्धांगिनी. नगराध्यक्षपदाच्या कार्यकाळामध्ये अनेक महत्त्वपूर्ण निर्णय घेतले गेले. याचे श्रेय अशोकराव दादांना निश्चित द्यावे लागतील. सातारा जिल्हय़ात नगराध्यक्षांची संघटना आणि माजी नगरसेवकांची संघटना स्थापन केली गेली आहे. यासाठी अशोकदादांनीच पुढाकार घेतलेला आहे. "कराड जिल्हा व्हावा" ही पहिल्यांदा मागणी जर कोणी केली असेल तर अशोकराव पाटील यांनीच. गतकाळात कराड जिल्ह्यासाठी अशोकराव पाटील यांनी अनेक प्रकारचे प्रयत्न केले. तत्कालीन परिस्थितीमध्ये केलेल्या आंदोलन, चळवळीबाबत यांच्याकडे वृत्तपत्रांची कात्रणे आहेत.कराड नगरपालिका, पंचायत समितीमध्ये कराड जिल्हाबाबत ठराव करण्यासाठी अशोकराव पाटील यांनी पुढाकार घेतला होता.


"प्रियदर्शनी"संस्था अंतर्गत असणाऱ्या सर्व संस्थांमधून अनेकांना रोजगार मिळवून दिला आहे.शिवाजी क्रीडा मंडळ स्थापना अशोकराव पाटील यांनी केले आहे. याच माध्यमातून अनेक खेळाडू जिल्हा व राज्यस्तरावर निर्माण झाले आहेत. MH50 म्हणून कराडला नवीन ओळख निर्माण झाली आहे. वास्तविक याचा मागोवा घेताना एक गोष्ट प्रकर्षाने उल्लेख करावा लागेल, तो म्हणजे वाहनधारकांच्या सोईसाठी आरटीओ कार्यालय कराडला व्हावे, यासाठी सातत्याने अशोकराव पाटील यांनी प्रयत्न केला आहे. स्वस्त धान्य दुकानदार संघटना, रिक्षा मालक चालक संघटना, सहा सीटर रिक्षा चालकांचे प्रश्न सोडवण्यासाठी अशोकराव पाटील अग्रक्रमावर असतात. शांतता समिती बैठक, गणेशोत्सवाचे नियोजन, कायदा व सुव्यवस्था, कोणतेही तंटे यामध्ये हिरिरीने भाग घेऊन गावात शांतता सुव्यवस्था राहावी. कोणताही कटू प्रसंग निर्माण होऊ नये. यासाठी योगदान देत असतात. अशोकराव पाटील प्रथम 1985 मध्ये नगरसेवक झाले. यानंतर त्यांनी कराड शहरासह तालुक्याच्या राजकारणात सहभाग घेतला.


अशोकराव पाटील यांनी राजकारणातील अनेक चढउतार पाहिले आहेत.माजी मुख्यमंत्री व दक्षिण विधानसभा मतदारसंघाचे विद्यमान आमदार पृथ्वीराज चव्हाण, कराड उत्तर विधानसभा मतदारसंघाचे आमदार सहकारमंत्री, पालकमंत्री बाळासाहेब पाटील, खासदार श्रीनिवास पाटील, यांच्यासह कराड नगरपालिकेतील नगरसेवक, कराड शहर व तालुक्यातील छोट्या-मोठ्या संस्थांचे पदाधिकारी, यांच्याबरोबर अशोकराव पाटील यांनी मित्रत्वाचा ऋणानुबंध कायम ठेवला आहे. प्रियदर्शनी संस्था समूहाचे प्रमुख म्हणून अशोकराव पाटील आजही अनेक क्षेत्रात कार्यरत आहेत.समाजातील सर्व घटकांना समान न्याय मिळाला पाहिजे. सर्वांचा आर्थिक उत्कर्ष झाला पाहिजे. या दृष्टिकोनातून अशोकराव पाटील आजही मोठ्या उत्साहाने काम करतात.अशोकराव पाटील उर्फ दादा हे कराड शहरातील हरहुन्नरी व्यक्तिमत्त्व म्हणून त्यांच्याकडे पाहिले जाते. समाजातील दुर्लक्षित वर्गासाठी आजही ते काम करत आहेत.


22 फेब्रुवारी रोजी अशोकराव पाटील उर्फ दादा यांचा वाढदिवस असल्यामुळे या वाढदिवसानिमित्त त्यांना मनःपूर्वक हार्दिक शुभेच्छा.... अभिष्टचिंतन...!


Popular posts
अशासकीय पदावरील नियुक्त्या रद्द ......महाराष्ट्र राज्य सहकारी परिषद, राज्यस्तरीय लेखा समिती, राज्य कृषि मूल्य आयोग
Image
कर्तव्यदक्ष मुख्याधिकारी कोणाला नको आहेत ! मुख्याधिकारी यशवंत डांगे यांना हटविण्याचा प्रयत्न सुरू
Image
सुट्टीत होणार शिक्षकांचे अधिवेशन
कराड वार्तापत्र - गोरख तावरे जनशक्ती आघाडीमध्ये बंड झाल्याने गटात गट निर्माण जानेवारी महिन्यातल्या पहिल्या आठवड्यात होणाऱ्या विविध समितींच्या सभापती निवडीच्या अनुषंगाने कराड नगरपालिका राजकारणात हालचालीस प्रारंभ झाला आहे. दरम्यान जनशक्ती आघाडीमध्ये उभी फूट पडली आहे. उपनगराध्यक्ष जयवंत पाटील यांनी आपल्या गटाला स्वतंत्र बसण्यासाठी वेगळी जागा सभागृहात द्यावी, अशी मागणी केल्याने जनशक्ती आघाडीत फूट पडली. कराड नगरपालिकेच्या राजकारणातील गटात गट निर्माण झाल्याची चर्चा संपूर्ण शहरभर सुरू आहे. दरम्यान ऐतिहासिक कराड नगरपालिका राजकारणातील आघाड्यांना फुटीचे ग्रहण लागले आहे. यापूर्वीही अनेक वेळेला नगरपालिकेमध्ये वेगवेगळ्या विचाराच्या निवडून आलेल्या आघाड्यांमध्ये बंड झाले, फूट पडली अशीच परिस्थिती सध्या निर्माण झाली आहे. स्वर्गीय पी. डी. पाटीलसाहेब कराड नगरपालिकेचे नगराध्यक्ष असताना 25 विरुद्ध 24 अशी सदस्य संख्या होती. दरम्यान एका सदस्याने बंड पुकारून विरोधात गेल्यामुळे सत्ताधारी गट अल्पमतात आला होता. दरम्यान मुरब्बी राजकारणी असणारे पी. डी. पाटील यांनी एका दिवसात हे बंड मोडून काढले. आपला गेलेला सदस्य पुन्हा आपल्या गटात घेऊन आले. नुकत्याच झालेल्या विधानसभा निवडणुकीच्या राजकारणामुळे कराड नगरपालिकेतील सत्ताधारी जनशक्ती आघाडीमध्ये फुट पडली असे बोलले जात आहे. नगरपालिका म्हटले की, गट-तट, आघाड्या, कुरबुडी, देणे घेणे असे सर्रास घडत असते. जनशक्ती आघाडी फुटली, नगरसेवक घेत असलेल्या वेगवेगळ्या भूमिकेमुळे फुटीचे राजकारण हा मुद्दा ऐरणीवर आला.कराड शहरासाठी विकास निधी राज्य शासनाकडून येतो. हा विकास निधी विविध कामावर खर्च करीत असताना कामाचा दर्जा बिलकुल नाही, ठेकेदार दर्जाहीन कामे करतात, हे अनेक कामे पाहिल्यानंतर स्पष्ट होत आहे. दर्जाहीन विकास कामे होत असल्याने नागरिकांची सातत्याने ओरड सुरू आहे. मात्र याकडे नगरसेवक अथवा प्रशासन गांभीर्याने पाहत नाही.यामुळे विद्यमान सत्ताधारी गटातील नगरसेवकांबद्दल नागरिकांच्या मनामध्ये तीव्र संताप निर्माण झाला आहे. मुख्य पदाधिकाऱ्यांसह सर्वच नगरसेवक कराड शहराच्या विकासाकडे लक्ष देणार का ? असा प्रश्न विचारला जात आहे. उपनगराध्यक्ष जयवंत पाटील यांनी गटात गट केलेला कायम राहणार का ? सभापतीच्या निवडीवेळी "तलवार म्यान" होणार का ? हे येणाऱ्या काही दिवसात स्पष्ट होईल. कारण जयवंत पाटील उपनगराध्यक्ष झाल्यापासून सत्ताधारी गटाचा सर्व कारभार जयवंत पाटील यांच्या नेतृत्वाखाली चालला आहे. दरम्यान जयवंत पाटील यांनीच बंड पुकारल्यामुळे जनशक्ती आघाडीचे काय होणार ? असा सवाल उपस्थित होत आहे. जनशक्ती आघाडीतील वाद चव्हाट्यावर आला आणि उपनगराध्यक्ष जयंवत पाटील यांनी सभागृहात वेगळी बसण्याची मागणी केली. कराड नगरपालिका राजकारणाची दिशाच बदलली आहे. उपनगराध्यक्ष जयवंत पाटील व माजी उपनगराध्यक्ष राजेंद्र यादव यांच्यामध्ये समेट घडावा यासाठी प्रयत्न केला जात आहे. विविध समितीच्या सभापतीची निवड करण्याचा अधिकार कोणाला ? आघाडीच्या अध्यक्षांना का नगरपालिकेतील गटनेत्याला ? याबाबत उलट सुलट चर्चा सुरू झाली आहे.दरम्यान विविध समितीच्या सभापती निवडीच्या अनुषंगाने आत्तापर्यंत राजेंद्र माने,महेश कांबळे, किरण पाटील यांना सभापती पदाची संधी मिळालेली नाही. यावेळेला सभापतीपदाची लॉटरी या तीन उमेद नगरसेवकांना लागेल का नाही ? हे अद्याप स्पष्ट झालेले नाही. नुकत्याच झालेल्या विधानसभा निवडणुकीमध्ये कराडच्या नगरसेवकांची भूमिका संभ्रमावस्थेत राहिली होती. कोणत्या उमेदवाराला पाठिंबा कुणाला द्यायचा ? प्रचार कोणाचा करायचा ? याबाबत मात्र कराड नगरपालिकेतील नगरसेवकांचे लवकर एकमत झाले नाही. कराडच्या नगरसेवकांनी आपली भूमिका लवकर स्पष्ट केली नाही. विधानसभा निवडणुकीतील नगरसेवकांच्या भूमिकेबाबत कराडमध्ये आजही चर्चा सुरू आहे.कराड नगरपालिकेला निवडून येणार्‍या नगरसेवकांची भूमिका कराड शहराच्या विकासाबाबत संवेदनशील हवी, मात्र सध्या ती दिसून येत नाही.  नगरपालिका निवडणुकीनंतर कराड नगरपालिकेमध्ये राजकीय तीन गट अस्तित्वात आले. यामध्ये लोकशाही आघाडी विरोधात बसली आहे. भाजपाचे काही नगरसेवक निवडून आले त्यांचा एक गट आहे. त्याचबरोबर सत्ताधारी म्हणून जनशक्ती आघाडी कारभार पाहत आहे. तर भाजपच्या नगराध्यक्षा स्वतंत्रपणे आपला कारभार करीत आहेत. उपनगराध्यक्ष जयवंत पाटील यांनी आपल्या पाच नगरसेवकांचा वेगळा गट निर्माण केला आहे. उपनगराध्यक्ष जयवंत पाटील यांचा गट म्हणजे गटात गट निर्माण झालेला आहे. जनशक्ती आघाडीच्या निवडून आलेल्या नगरसेवकांच्या बरोबर आता इथून पुढे आपला "घरोबा" असणार नाही असे सांगून त्यांनी कराड नगरपालिकेचा कारभार सुरू केला आहे. यशवंत विकास आघाडीचे राजेंद्रसिंह यादव यांना मांणणारे नगरसेवक आहेत. मात्र राजेंद्रसिंह यादव हे नगरपालिका राजकारणात, नगरपालिका कारभार चालवण्यासाठी जेवढा वेळ द्यायला हवा, तेवढा वेळ देत नाही, त्यामुळे नगरसेवकांनी अडचणी कोणासमोर मांडायच्या ? हा प्रश्नच आहे. अशी एकाकी पडलेले नगरसेवक आता एकत्रित सर्वांची मोट बांधण्याचा प्रयत्न करीत आहेत. याला किती प्रतिसाद मिळेल, हे आत्ताच सांगता येणार नाही. येणाऱ्या कालावधीमध्ये गटातला गट शिल्लक राहतो का ? जनशक्ती आघाडीच्या छत्रछायेखाली निवडून आलेले सर्व नगरसेवक एकत्र राहणार का ? हे काही कालावधीनंतर स्पष्ट होईल.  जानेवारी महिन्याच्या पहिल्या आठवड्यामध्ये विविध समितींच्या सभापतींची निवडणूक होणार आहे. यावेळी गटातला गट अथवा जनशक्ती आघाडीची काय रणनीती राहणार हे पहावे लागेल. कराडमधील राजकीय समीकरणांबाबत उत्सुकता निर्माण झाली आहे. दरम्यान, उपनगराध्यक्ष जयवंत पाटील यांनी आपल्यासोबत महेश कांबळे, कश्मिरा इंगवले, माया भोसले, अरुणा पाटील हे नगरेसवक असल्याचा दावा केला आहे. उपनगराध्यक्ष जयवंत पाटील हे भाजपचे डॉ. अतुल भोसले यांचे समर्थक आहेत. तर राजेंद्रसिंह यादव गट श्री. छ. उदयनराजे भोसले यांचे समर्थक आहेत. त्यामुळेच आता नगरपालिका राजकारणात काय होणार ? याबाबत उत्सुकता निर्माण झाली आहे. नगरपालिका निवडणुकीत आ. पृथ्वीराज चव्हाण यांच्या नेतृत्वाखालील यशवंत जनशक्ती लोकसेवा आघाडीचे 16 नगरसेवक विजयी झाले. तर या आघाडीला एका महिला नगरसेविकेने पाठिंबा दिला. दरम्यान निवडून आल्यानंतर प्रथम जनशक्ती आघाडीच्या नगरसेवकांनी पृथ्वीराज चव्हाण यांचा विश्वासघात केला आणि त्यांचे नेतृत्व झुगारून दिले. कराड नगरपालिकेत भाजपाचे पाच, लोकशाही आघाडीचे सहा तर बहुमतात असलेल्या जनशक्ती आघाडीसह आ. पृथ्वीराज चव्हाण यांचे नेतृत्व मानणारे कॉग्रेसचे शहराध्यक्ष राजेंद्र माने असे गट कार्यरत आहेत. उपनगराध्यक्ष जयवंत पाटील यांनी राजीनामा द्यावा, असे बहुमतात असलेल्या जनशक्ती आघाडीतील काही नगरसेवकांचे म्हणणे होते. दरम्यान उपनगराध्यक्ष पाच वर्ष माझ्याकडे राहील" या अटीवर "उपनगराध्यक्षपद घेतले असल्याचे जयंतराव पाटील सांगतात. यामुळे उपनगराध्यक्ष बदलाचा प्रश्नच येत नाही. यशवंत आघाडी राजेंद्रसिंह यादव यांची, जनशक्ती आघाडी अरुण जाधव यांची तर लोकसेवा आघाडी जयवंतराव पाटील यांची आघाडी आहे. या तिघे पृथ्वीराज चव्हाण यांच्या नेतृत्वाखाली एकत्र आले होते. जयवंत पाटील यांच्याकडे उपनगराध्यक्षपद असल्यामुळे नगरपालिकेत दररोज जयवंत पाटील दिसतात. अरुण जाधव नगरपालिकेकडे फिरकतही नाहीत. तर राजेंद्रसिंह यादव आपल्या कामाचा व्याप सांभाळून, जेवढा वेळ देता येईल तेवढाच वेळ देतात. यामुळे अनेक प्रश्न निर्माण झाले आहेत, ते कोण सोडवणार ? हा खरा प्रश्न निर्माण झाला आहे.
Image
वृत्तपत्र विक्रेत्यांच्या सुरक्षेचे काय ? पत्रकारांची काळजी कोण घेणार ? पत्रकारीतेचा "घेतला वसा" म्हणून काम करणे योग्य नाही
Image